Kumnyama

Ngimi lo!

Ngisele angisaboni 

Ngisele ngenta taba angisakhoni

Ngiyabeketela ngiyetama angisakhoni

Emehlweni ami kumnyama

Ngimi lo!

Ngihleti ngedvwa, kumnyama

Itolo loku bekukhanya nginelitsemba 

Lingiphilisa kumnandzi ngitetsemba

Ngibona ngiboniswa 

Libalele kukhanya ngihlonishwa

Namuhla ngisebumnyameni, kumnyama

Kumnyama angati ngitophelelaphi

Kumnyama angati ngiyositwa ngulobuyaphi

Ngimi lo!

Lingishonele lilanga, kumnyama

Ngivukile ngetama ngatikhandla

Ngatikhandla ngawo onkhe emandla

Ngivukile ngetama, kumnyama

Ngaticinisa ngaphutsata sibane, kumnyama

Ngimi lo!

Bumnyama buyangihlebela buyangehlulela

 Ngetamile kububalekela ngehluleka kububhacela

Bubuye bangihleka bulima bangihheletela

Umtfwalo wami uyesindza 

Emahlazo ami ngiyazama kuwafihla 

Emehlweni ami kumnyama

Emehlo ami akasasebenti

Kuhhohloka tinyembeti 

Umesuli wetinyembeti akabonakali, kumnyama

Inhlitiyo igaya tiboti iyabalisa, imnyama 

Ngimi lo!

Ngiyakukhumbula kukhanya

Ngiyakukhumbula malanga onkhe

Kubaluleka kwakho ngiyakubona malanga onkhe

Ngikufuna madvute nami

Ngemehlo emcondvo sengiyabona kukhanya konkhe

Ngemehlo emcondvo ayifahlaki inhlitiyo yami

Awungishiyi ungibamba ngesandla ebumnyameni

Sidanse ungicabule ngaphansi kwetinkhanyeti

Sidanse sijikelete ebumnyameni 

Sivete nelemhlatsi kungesiko ebuntfwaneni

Sifanelene sekubonakele

Sengikubonile konkhe sekwanele 

Ngiyakukhumbula kukhanya

Ngiyakukhumbula malanga onkhe

Kubaluleka kwakho ngiyakubona malanga onkhe

Ngikufuna madvute nami

Umhlaba lowukuwo

Nami ngibe kuwo