Nali letfwele liyahashatela
Lengca tonkhe tihosha licondze la liyashashabula
selivele liphansi letfwele
Ngihleti ngedvwa ngeswele
Ngihleti ngedvwa umoya ukhatsatekile
Ingcondvo isangene ikhungatsekile
Ngiphila kalukhuni imphilo iyangiphicaphica
Liyamanyata nemafu amnyama ayangifica
Liyagagabula liyagcoba likhafula emalangabi
Lidvume lengca
Lengca netilimo nemiphefumulo yalabanye
Ligadla ngemandla lihambe libuye
Libuye nebantfwabalo
Lalandza lalandzisisa
Ngalibuka letfwele ngalibukisisa
Ngatibuta ngatiphendvula ngivisisa
Leni nje siphatsane kanjena?
Ngikwenteni na?
Inkinga ikuphi?
Ngalamanye emalanga ngiyehluleka kutibamba
Titsi chu!
Njengumfula tinyembeti tigelete
Ngihlehlele emuva ngitidedele
Ngikhongetele ngigeze ebumnyameni
Lidvume lengca
Labalati kancono batsi liyadvuma lengce kubencono
Labangati kancono batsi nginawo emandla ekwenta konkhe kubencono
Ibebovu indlela ngihambe
Bubeluhlata klaba! tjani iye emadlelweni imfuyo ihambe
Shonamalanga lidvume lihambe
Lidvume lengca
Ematje nemagadze esangcotfo engca
Emehlweni ami libalele
Butfongo buyehla noma sengilele
Lidvume lengca
Lidvume lengca nebantfwabalo
Laphuma lilanga
Ngatsamela ngakhanyisa
Lidvume lengca
Lubuyile nelutsandvo
Lungilalele lwangipha indlebe
Ngibambelele kulo sisobabili
Siyancokola sihleti kumnandzi sisobabili
Lungibuke emehlweni
Injabulo ibhalwe ebusweni
Lutsandvo lutsi nalo belungasatsandzi nasengihlala ngikhala njalo
Ngite emagama ekuchaza injabulo yekubakhona kwalo
Emanceba apholile
Litsemba nenshisekelo kubuyile
Lidvume lengca inhlitiyo ithulele
No comments:
Post a Comment